借 电 话
原作：夏雨田 改编：黄俊英
表演：黄俊英 杨达
（按原相声视频整理）
https://haokan.baidu.com/v?pd=wisenatural&vid=2427004820967498412 杨：我e叫杨达，系一个相声演员。
黄：我e转咗行啦，我系电话局嘅，我个名叫做菊花圆。
杨：我屋企依家装咗个电话啦。
黄：对啦，佢嘅电话系我负责装到佢家。
杨：对。不管点样好，我先多谢你同埋多谢电话局。
黄：Hey，使乜客气，不过咁喔……
杨：点啊？
黄：第日我哋电话局开晚会，请你出返个节目助庆一下喔。
杨：咁话咁易唔止咁易啦。只要你开声啫，我保证同你搞掂晒佢。
黄：系咪啊？（头退一下）
杨：系，横早我依家写紧一个节目叫做“金钱版说唱”。
黄：叫咩名？
杨：叫《赞电话》。
黄：电话都赞得？（后退一步）
杨：梗系赞得啦。
黄：喂，噏几句嚟听下哩？
杨：喂，顺口溜嚟嗝之喔。
黄：好啊，好啊。
杨：嗱，听完之后多提意见。
黄：无客气。
杨：好无？
黄：嗯嗯。
杨：听住。话说呢一日，正系我休息，电话局嘅菊师傅真系够晒积极。佢为我装电话呢，zhe系全心兼全力。依家屋企有个电话，我做起事嚟的确zhe够晒招积。一个电话搞掂晒，啊唔使下下去打的。
黄：啊，好嘢喔，好嘢，好嘢！
杨：好乜嘢？真系！
黄：啊，di di 的的的的，咁吓哗？
杨：啊，过奖过奖。
黄：嗱，咁啊吓，我有D事我走先。
杨：走啦？
黄：得闲再探过你，好无？
杨：得闲坐下……
黄：系咁先吓。
杨：好（笑，关门）哎，真系屋企有个电话，零舍唔同㗎，车钱悭返好多啊嘛。吓，好似我二楼果个张太e ，旧年都装咗个电话啦。哩，今日轮到我装啦。我听讲我哋三楼同埋四楼果个谭sir啊、周sir啊咁样，佢哋已经申请紧准备装。应该啦，线路咁多，又方便，吓话？真系！
黄：开门，开门！
杨：边位啊？
黄：（指另一边）楼上曾大婶啊。
杨：哦，（开门）系，曾大婶，咁坐荡嘅？
黄：想借个电话打下之嘛。
杨：哟！咁快借电话？！
黄：乜你又唔肯借啊？
杨：唔系，有咩唔肯借啫？借电话有咩所谓啫？哩，（“请”的手势）过嚟，过嚟。
黄：啊，你e真系好人啊。
杨：点啊？
黄：你唔同随阿二楼张太啊。
杨：二楼张太点呢？
黄：哎呀，二楼阿张太硬系唔肯借。
杨：点解唔肯借啊？
黄：因为话会出人命啊，负唔起责任。
杨：A，借电话点会出人命啫？
黄：系啊，因为佢话个电话会漏电，（杨笑）仲话专门电D伯爷婆添喔。
杨：你听佢讲啦，电话点会漏电啫？
黄：你个电话唔会漏电啊嘛？
杨：唔会，唔会，你打，你打，你打。（黄提话筒按键）哎，电话会漏电。阿大婶啊，（A！）最好你快D咁多。
黄：得啦，好快脆，最多唔超过半个钟头。
杨：哗，（挠头）半个钟头仲好快啊？
黄：（笑）喂，系咪大西洋宾馆呢？系啊，我揾阿玉珠哦。
杨：哦，揾亲戚。
黄：系我外甥女咯，今年e二十一岁，身高一米六“八”，未行结婚未有对象，住系江东大道五十“八”号，（哟！）系顺德人嚟嘅！（大婶啊…）啊……吓？
杨：你唔系打电话报户口啊吓哗？点解讲得咁清楚嘅？
黄：讲清楚人家容易揾啊……喂，喂，哦……你问佢响你哋宾馆边个部门做嘢啊？佢系响卖喊酸果个部门咯。
杨：哦，可能系餐厅嘞。
黄：咩话？你哋宾馆无卖喊酸个部门……我知啊，佢唔系响你哋宾馆度卖喊酸。
杨：哟，佢系边度卖呢？
黄：佢系响你哋宾馆大门口（手指左边）斜对面左手面个巷口摆档卖喊酸哦。
杨：哎哟，原来摆地档啊？（啊！）同你乜关系啊？
黄：系无关系，不过麻烦你“L”阿玉珠嚟听电话得唔得？（哟！）咩话？你哋唔得“闲”啊？（啊！）哎呀，同志啊，你学学雷锋好唔好？（墟……）阿个档口离你哋宾馆好近嘅，阿玉珠奉旨唔会走开嘅，除非阿sir嚟佢就走唔彻嘅啫。
杨：哗，原来无牌摊贩添。
黄：（大声）喂，喂，（话筒离耳，挠头）突然间无声嘅喂？
杨：梗系无声啦，大婶啊，人哋早就收咗线啦。
黄：（放下话筒）A……乜嘢服务态度？（哟！）一D人情味都无！（“一”字重音，走开两步）（墟……）算啦，等阵间再嚟打过啰。
杨：仲嚟打过啊？
黄：你唔知啦，阿二姑e啱啱病好咗无乜胃口，吃D喊酸开下胃，咁咪打个电话“L”阿玉珠攞D返去俾佢啰。
杨：哦，咁睇嚟阿大婶又几好人个喔。
黄：阿二姑啊孤寡老人啊，大家都要关心佢嘅嘛。
杨：对对对对，应该关心，应该关心。（哎！）哩，咁阿大婶，（唔？）一阵间你唔使再嚟嘞。
黄：咁点啊？
杨：横早我出街，（哦！）嘞，我就响街上咁e买D我亲自送去咪得啰。
黄：咁e唔该晒你啦喔。
杨：唔使唔该，关心孤寡老人……
黄：系咁我旨意你啦。
杨：好好好，（走啦！）走啦？慢慢行啊吓。好！（关门）系……
黄：（回头）开门，开门！
杨：咦？咩啊大婶？漏咗咩嘢啊？（帮大婶找）
黄：唔系漏嘢，啱先唔记得同你讲拜拜啊。（杨失笑）拜拜！
杨：（笑）拜拜！哎，几乎落到地下仲返转头拜拜，睇唔出大婶几阿岁人仲咁生鬼。你话死唔死啊嘞？无啦啦俾阿大婶搞咗咁耐时间，真系仲使做野嘅？
黄：开门，开门！
杨：又边位啊？
黄：老杨，想借个电话打下啦。
杨：A，原来周伯。（开门）
黄：老杨么？
杨：咩事啊，点呢？
黄：想借个电话打下啦。
杨：你又借电话啊？啊，周伯啊，你啊住响我地下啦，（唔！）走上去六楼借个电话，咁真系咁高，难为你爬喔。
黄：要冲壶靓茶？得咯，唔使咁客气咯，求其有马骝搣就得咯。
杨：我唔知几时有冲壶靓茶呢？睇嚟周伯只耳有D撞聋嘞。
黄：哦，无马骝搣有乌龙啊？乌龙都好咯，呵呵………
杨：咩乌龙啊？我话你只耳啊，有D唔掂啊。
黄：你个电话又系漏电？
杨：电话点会漏电嘅啫？
黄：咩唔会啊？二楼张太个电话就漏电咯。
杨：你听佢噏啦。佢唔肯借俾你就真。
黄：佢唔肯借就罢，你肯借得，你个电话唔会漏电？（指电话）
杨：唔会，唔会，唔会。打，打，打，打！
黄：A…………
杨：电话又系漏电嘅？真系！点啊？乜反应啊？
黄：得啦。喂，系咪汽车公司啊？喂，喂……（拍电话）
杨：（心痛电话）周伯啊，你唔使催佢。
黄：唔催佢唔响。
杨：哎呀，你估喇叭咩？
黄：听唔到啦。
杨：你梗系听唔到啦，你知唔知啊？你只耳有D撞聋啊，点听啊？
黄：（放下电话）不如咁啦，
杨：点啊？
黄：麻烦你帮下手哩？
杨：点帮法？
黄：你同我揸住个电话，我讲说话你同我传过去，“尼塞”讲说话你就同我传返过来。
杨：咁咪变咗电话线？
黄：得吗？
杨：无计啦，（黄一直笑）佢听唔到嗝嘛，如果唔系啊，佢打到天光未掂。
黄：系咯，系咯。
杨：得得得……
黄：唔该晒。
杨：啊，周伯，讲掂先。（哦！）你嘅意思系咪即系话，我帮你听电话，（系！）你讲乜嘢哩，我学返俾对方听；（系！）对方讲乜嘢，我讲返俾你听？
黄：无乜假咯。
杨：系咁啦嘛？好，电话号码几多号？
黄：837754。
杨：几多话？
黄：（大声）837754！
杨：（重复）837754！（系！）正一“鉴生激激唔死”。咁……唉……（拨电话）837754。通嘞，讲啦！
黄：系咪汽车公司啊？
杨：系咪汽车公司啊？系喔，问你揾边个喔？
黄：我揾周日发啦。
杨：我揾阿周日发啦。佢话系周日发，问你系边个喔？
黄：我系你老豆。
杨：我系你老豆。佢话，系你阿爷喔。
黄：吓？
杨：佢话系你阿爷啊。
黄：混账！
杨：混账！咪咪咪咪咪咪咪，喂，唔好误会吓，千祁无误会。我呢，就系六楼阿老杨。系，你个老豆哩你知嘎啦，佢有D撞聋啊嘛。佢打电话俾你，佢惊你听唔到，因此叫我嚟同佢打，佢讲乜嘢我讲乜嘢，你讲乜嘢我讲返俾佢听，就咁嘅啫。唔系揾笨，傻嘅咩？真系！几廿岁人攞D咁嘅嘢嚟玩？好好好，我问佢吓。问你有咩事？
黄：阿家嫂生咗个仔。
杨：哦，喂，周日发啊，恭喜你啊！你老婆生咗个仔啊。系，真系啊！好好好，我问佢先。改咗名未喔？
黄：等佢老豆起名。
杨：喂，等你起名啊。吓？起咗啦？喂，叫咩名啊？周时发啊。哗，佢老豆叫周日发，同个仔改个名叫周时发，咁你两仔爷咪发晒？俾D人哋发下至得嘎。好好好，我讲佢听啊。改咗啦，（A！）叫周时发。
黄：乜啊？
杨：周时发啊。
黄：走私犯啊？
杨：咩走私犯啊？叫周时发！（哦！）即系话周时都发咁样。
黄：哦，周时发。（A！）发就好咯，发咗之后，我哋都装返个电话咯，哈哈…………
杨：咁就死得人多咯。等个孙大个发咗先至装返个电话喔，咁个电话咪有派捱？仲有乜讲先？
黄：无咯。
杨：喂，你个老豆无啦。咪咪咪咪唔系，口快快真系，大吉利是！真系！无无无，我问佢有无咩讲，佢话无嘞，所以咁……系，你无嘢吓嘛？无。好，就咁先吓，拜拜！（对黄）周伯，（A！）恭喜喔！（乜啊？）仲使问嘅？真系啊！抱孙嘞嘛，系哗？
黄：系！（笑）
杨：咁系咪恭喜啊？嘞，咁你得闲嘅时候呢，响屋企抱住金钵罗玩下，咁你e唔使咁烦嘎啦。
黄：仲要留我吃饭？唔吃咯，走咯。（走啦？）走咯。（唔送le喔。）唔使送咯，够钟吃饭再上过来咯。哈哈哈哈……
杨：哎，正式聋人好辩驳啊。唔知几时有请佢食饭呢？唔使送咯，够钟食饭上过嚟咯，好似食硬咁样，真系！啊，咁样你话死唔死嘞？有电话又烦，无电话又烦。呢，依家有啦，你话唔借嘛，咁又唔系几好，大家街坊街里同屋共主，唔通借个电话打下话唔得咩，吓哗？呢D叫互相帮助啊嘛。你话借嘛咁样，你话碰啱好似周伯咁聋盲嘅……
黄：开门，开门！
杨：又边个啊？
黄：杨先生你开咗门就知我系乜水个咯！
杨：哦，我仲以为系边位添，原来系阿张太吓哗。
黄：乜仲识得叫我做张太么？我以为你装咗个电话，连楼上楼下都无有识得嘞呢。
杨：A，装咗个电话，有乜咁巴闭e ，点会唔识人至得格？啊，系哩，你揾我咩事啊？
黄：想借个电话打打呢。
杨：开玩笑吓嘛？张太！乜你都使借电话嗝咩？
黄：无有肯借么？
杨：唔系，咁你屋企已经有电话嘞……
黄：系，我个电话私人装个，打一次要三几毫子，打长D要三两蚊鸡嘅呢。
杨：咁缩骨嘅人都有嘅，真系！系啦，我个电话又系私人装嘅。
黄：A，无有系。你系名演员，你个电话公家同你装个。
杨：话就咁话啫，咁都要交电话费嘎。
黄：你无有知我电话出咗故障，打无通呢。
杨：我个电话亦出故障，打唔通喔。
黄：你个电话咩故障呢？
杨：漏电！（漏…）专门电D女人嘅。
黄：死无死？我个电话专电伯爷婆，佢个电话专电女人个。无有系，你无使呃我。电话无得漏电个，我车大炮吓D伯爷婆嘅啫。
杨：正式鬼拍后尾枕啦，咩嘢都讲晒出嚟啦。
黄：你借无借么？
杨：如果我唔借呢？
黄：你无有借，我索性坐系度坐到你开饭都无有走。
杨：哟！咁long嚟嘅人都有嘅？嚟，打打打打，快D。
黄：早就应该借俾我打，又无话阻到你好多时间。
杨：唉，怕咗你先怕塞车啊。
黄：（打电话）喂，系无系金花酒楼哩？系我揾阿张大眼哩，花名叫大眼鸡哩。
杨：哟，原嚟打电话揾老公喔。
黄：咩话？你就系大眼鸡？你只死佬你哗！我早就知你拉果班猪朋狗友饮酒，你只发瘟鸡你哗！一日啊出外剂风花雪月，丢底啊老娘坐系屋企捱隔夜菜。
杨：我睇讲说话呢斯文一D好。
黄：咩话？倾工作？你无使呃我。你梗捞只狐狸精系度鬼鬼混混，（哟！）大眼鸡我警告你，你有第三者，我就有第六者。
杨：（笑）哎，正式人唔自量就无药医。好心你睇下你个样啦，佢话佢有第六者添喔，真系！
黄：咩话？你无理我？你无理我，大把人理我；（系咩？）你嫌弃我，大把人喜欢我；（re）你讨厌我，大把人爱我。（唔！）我话你知，我家阵间就企紧个人就搏命追紧我。（吓？）系乜水？我无有话你知。人家比你好得多，人家样子靓过你，人家个身材几潇洒。无学得你，走起来成只栋企水鱼咁样，只眼大只眼细。人家双眼有电个，识讲相声，识写金钱版，屋企装个电话几架势啊！
杨：我啊？
黄：大眼鸡，佢啱先表态个咯，佢话你明天上午同我离婚，下午就同我登记个咯。
杨：哎呀……
黄：我话你知，你今晚超过十分钟无返嚟，我就马上执包袱走人。
杨：你走人啊？你走边度？
黄：我搬嚟你屋企住咯。
杨：你无害我，我讲你听啊，嘻呀！
黄：无使惊得咁交关，正一胆小鬼，我吓下大眼鸡嘅啫。
杨：最怕吓你大眼鸡吓唔到，吓到我啵。
黄：杨先生，你无使自作多情，对我想入非非。装咗个电话好巴闭。
杨：我无讲巴闭。
黄：我屋企有只电话。
杨：我知。
黄：我个电话号码比你好记，（唔！）66679046，即系666，专俾人戴绿。哼！哼……！（出门）
杨：哼！啊真系岂有此理，咁贱格嘅人都有嘅？唔愤气，落去闹佢至得。唔好，费事同佢捱交，失斯文，打个电话向佢批评下。（提起话筒）岂有此理，等佢666，专俾人戴绿啊啦。
（拨电话）喂，张太啊？揾你做乜？无，向你提下意见咯。你头先系我屋企打电话果阵时啊，（张太已再次入屋）真系太唔似样啦。睇你一表斯文，讲说话俗到死；专贪小便宜，心灵很不美；外表鬼咁靓，里头似只烂沙梨。你D咁嘅所作所为啊，我话你听啊，如果你唔改嘅，你将来行到边度都好，都系神台猫屎——神憎鬼厌嗝咋。
黄：（拍杨肩）你好嘢！
杨：啊？乜你几时上嚟啊你？
黄：你都无关门，我咪入来咯。
杨：无关门，你就入得嚟嘞咩？
黄：你好嘢啊，讲说话有板有眼，押晒韵脚，用电话闹人，你几新鲜啊！
杨：喂，我无闹你喔，我只系向你提意见之喔。
黄：提意见？话我讲说话俗到死？
杨：咁你话系唔系啊？
黄：心灵很不美。
杨：你自己知。
黄：你拆咗我电话我都无有使怕。
杨：咁即系你呢种人乜都唔使怕嘎啦。
黄：反正我住系你楼下。
杨：做咩啊？
黄：从明天开始，我日日来你屋企。
杨：咦？
黄：借电话！
杨：系……
——全剧完